O‘zbekistonlik tennischilar ITF Juniors turnirida chempion bo‘lishdi

13–19-oktabr kunlari Boku (Ozarbayjon) shahrida ITF World Tennis Tour Juniors J30 Baku xalqaro tennis turniri bo‘lib o‘tdi. Unda Yevropa va Osiyoning o‘nlab mamlakatlaridan eng kuchli yosh tennischilar ishtirok etishdi. O‘zbekistonlik sportchilar yakkalik va juftlik bahslarida g‘alaba qozonib, yuksak natijalar qayd etishdi.

Yakkalik bahslari
O‘zbekiston vakili Mahmudbek Beknazarov turnir davomida ishonchli o‘yin ko‘rsatib, finalda Belarus tennischisi Nikita Davidovskiyni 6–2, 4–0 hisobida mag‘lub etib, turnir chempioniga aylandi. Tashrif buyuruvchilar orasida birinchi raqam ostida saralangan Beknazarov final yo‘liga chiqish jarayonida Rossiya, Ruminiya va Gruziya vakillarini mag‘lub etib, o‘z ustunligini isbotladi.

Juftlik bahslari
Juftlik musobaqasida esa o‘zbekistonlik tennischilar Amir Safaev va Asilbek Ismoilov ikkinchi raqam ostida saralangan juftlik sifatida g‘alabaga erishishdi. Ular finalda Belarus vakillari Artsyom Askirka va Mark Haydt duetini 6–3, 0–6, [10–7] hisobida mag‘lub etishdi. O‘zbekistonlik duet yakuniy bahsda o‘zaro ishonch, bardamlik va kurashchanlikni namoyon etib, muhim g‘alabani qo‘lga kiritdi.

Natija
Mazkur natijalar o‘zbekistonlik yosh tennischilarning xalqaro maydondagi o‘sishini va O‘zbekiston Tennis Federatsiyasi hamda murabbiylar tomonidan olib borilayotgan tizimli tayyorgarlik ishlarining samaradorligini yana bir bor tasdiqladi. Ular bugungi kunda xalqaro arenada muvaffaqiyatli raqobat qila oladigan sportchilarga aylanganini ko‘rsatdi.

O‘zbekiston tennis federatsiyasi matbuot xizmati