ITF W15 Tashkent xalqaro turniri g‘olibasi aniqlandi
Poytaxt tennis markazi kortlarida ITF World Tennis Tour W15 Tashkent xalqaro ayollar tennis turniri yakuniga etdi. Turnir 20–26 oktabr 2025-yil sanalarida O‘zbekiston tennis federatsiyasi tashabbusi bilan Xalqaro tennis federatsiyasi (ITF) homiyligida o‘tkazildi.
Hal qiluvchi final bahsida Belarus vakili Darya Xomutyanskaya va Rossiya vakili Darya Egorova kuch sinashdi. Qizg‘in kurashlarga boy kechgan finalda Xomutyanskaya 6-2, 6-2 hisobida zafar quchib, Toshkent kortidagi ilk chempionlik unvonini qo‘lga kiritdi.
ITF W15 Tashkent musobaqasi xalqaro tennis taqvimida muhim o‘rin egallab, 17 dan ortiq davlatdan kelgan professional tennischilarni birlashtirdi. Turnir yosh sportchilarga ITF reytingidagi o‘rnini mustahkamlashga, tomoshabinlarga esa Toshkent kortlarida yuqori darajadagi o‘yin va sport mahoratini tomosha qilish imkonini taqdim etdi.
O‘zbekiston tennis federatsiyasi matbuot xizmati
