O‘zbekistonlik tennischilar ITF J60 Almaty turnirida yorqin natija ko‘rsatdi

Qozog‘istonda 2025-yil 27-oktabrdan 2-noyabrgacha o‘tayotgan ITF World Tennis Tour Juniors J60 Almaty xalqaro yoshlar turnirida O‘zbekiston vakillari yuqori tayyorgarlik va ishonchli o‘yinni namoyish etib, juftlik bahslarida yetakchi pozitsiyalarni egallashdi.

Danila Kvasov va Ahmadjon Toshmuhamedov juftlik bahslarida chempionlikni qo‘lga kiritib, finalda hamyurtlari Nikita Gafurov va Alan Zinatulinni 3–6, 7–6, [10–4] hisobida mag‘lub etishdi.

Chempionlik yo‘lida Kvasov va Toshmuhamedov Qozog‘istonlik duet — Rodion Lukashov va Dias Tulepbergenovni 6–3, 6–3 hisobida taslim etib, butun turnir davomida barqarorlik va kuchli jamoaviy hamkorlikni namoyon qilishdi.

A’lo natijani Akmal Abdullaev va uning rossiyalik hamkori Vadim Lyashenko ham qayd etishdi — ular yarim finalgacha yetib borib, hal qiluvchi kurashda o‘zbekistonlik Gafurov va Zinatulin juftligiga 6-4, 1-6, [10–7] hisobida imkoniyatni boy berishdi.

O‘zbekistonlik sportchilarning bunday muvaffaqiyatli ishtiroki mamlakatda yoshlar tennisi rivoji va istiqbolli o‘yinchilarni xalqaro kortlarda ishonch bilan raqobatlashishga tayyorlash borasida O‘zbekiston tennis federatsiyasining samarali ishlarini yana bir bor tasdiqlaydi.

O‘zbekiston tennis federatsiyasi matbuot xizmati